Rev 13 | BOJ | STEP | Onaqa e olo ŋam atsimqa wagme juwaŋ bei yuwalq dena brantonaq unem. Aqa gate 7-pela ti aqa qala 10-pela ti soqnej. Aqa qalaq di gate tatal 10-pela soqneb. Gate tatal di mandor kokba naŋgi na ateqnub deqaji bul. Aqa gateq di ñam qudei neŋgreŋyonab soqnej. Ñam di Qotei misiliŋyo qaji ñam.

Revelation of John 13

Wagme juwaŋ aiyel naŋgi branteb

1 Onaqa e olo ŋam atsimqa wagme juwaŋ bei yuwalq dena brantonaq unem. Aqa gate 7-pela ti aqa qala 10-pela ti soqnej. Aqa qalaq di gate tatal 10-pela soqneb. Gate tatal di mandor kokba naŋgi na ateqnub deqaji bul. Aqa gateq di ñam qudei neŋgreŋyonab soqnej. Ñam di Qotei misiliŋyo qaji ñam. 2 Wagme juwaŋ e unem qaji di pusi juwaŋ bul kobaquja. Pusi di aqa ñam lepat. Aqa siŋga bea aqa siŋga bul. Aqa medabu laion aqa medabu bul. Amal uge kobaquja a na aqa segi siŋgila wagme juwaŋ di yosiqa minjej, “Ni e ombla mandor kokba sqom.” Osiqa a siŋgila kobaquja yej. 3 Wagme juwaŋ di aqa gate bei nami qalnab moisiq yu ti so bulonaq unem. Yu di olo mosoonaq aqa pirigi unem. Onaqa tamo uŋgasari kalil wagme juwaŋ di uneb qaji naŋgi tulaŋ prugugetosib a dauryoqneb. 4 Amal uge kobaquja a na aqa segi siŋgila wagme juwaŋ di yej deqa tamo uŋgasari naŋgi amal aqa ñam soqtoqneb. Osib wagme juwaŋ dego aqa ñam soqtoqnsibqa maroqneb, “Tamo yai aqa siŋgila wagme juwaŋ aqa siŋgila ti kere? Tamo yai na a qoto itqa kere? Tamo deqaji bei sosai.”

5 Ariya Qotei na wagme juwaŋ di odyonaqa tigelosiqa diqoqnsiqa Qotei misiliŋyoqnej. Qotei na a siŋgila yonaqa bai 42 a kumbra di yoqnej. 6 Yoqnsiqa aqa segi medabu waqtoqnsiqa Qotei misiliŋyoqnej. Qotei aqa ñam ti aqa qure koba ti aqa segi tamo uŋgasari laŋ qureq di unub qaji naŋgi ti wagme juwaŋ dena misiliŋnjroqnej. 7 Onaqa Qotei na wagme juwaŋ di olo odyonaqa tigelosiqa Qotei aqa segi tamo uŋgasari naŋgi qoto itnjroqnsiqa naŋgi ñumoqnsiqa a segi qoto siŋgilaoqnej. Onaqa Qotei na a olo siŋgila yonaqa a na tamo uŋgasari kalil leŋ segi segi qaji, sawa segi segi qaji, anjam maro segi segi qaji, jejamu segi segi qaji naŋgi taqatnjroqnej. 8 Deqa tamo uŋgasari kalil mandamq endi unub qaji naŋgi na wagme juwaŋ di biŋiyoqnsib aqa ñam tulaŋ koba soqtoqneb. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai. Buk di agi Kaja Du nami qalnab moiej qaji aqa segi buk.

9 Tamo a dabkala ti sosimqa a anjam endi geregere qusim poiyem. 10 Qotei a tamo bei tonto talq di waiyqa marimqa tamo di osib tonto talq di waiyebe. Tamo bei na tamo bei sebru na qalqas di a kamba sebru na qalib moiqas. Kumbra di brantimqa Qotei aqa segi tamo uŋgasari naŋgi unsibqa siŋgila na tigelosib naŋgo areqalo Yesus qa siŋgilatosib soqnebe.

11 Ariya e olo ŋam atsimqa wagme juwaŋ bei mandam miligiq na brantonaq unem. Wagme di aqa gateq di qala aiyel soqneb. Qala di kaja du naŋgo qala bul. Aqa anjam maro amal kobaquja aqa anjam maro bul. 12 Wagme juwaŋ dena wagme juwaŋ e nami unem qaji aqa siŋgila kalil yaiyosiqa a na mandam ti tamo uŋgasari mandamq di unub qaji naŋgi ti naŋgo areqalo tigel-tetnjreqnaqa naŋgi wagme juwaŋ e nami unem qaji a qa louoqneb. Wagme juwaŋ e nami unem qaji di agi qalnab moisiqa aqa yu olo mosoonaq e aqa pirigi unem. 13 Wagme juwaŋ bunu brantej qaji di a maŋwa tulaŋ kokba yeqnaq unem. Maŋwa bei endegsi yoqnej. A na tamo uŋgasari naŋgo ŋamgalaq dia laŋ goge tarosiq ŋamyuo meteqnaqa laŋ goge dena ŋamyuo brantoqnsiqa mandamq aioqnej. 14 A na maŋwa di wagme juwaŋ e nami unem qaji aqa ŋamgalaq di yoqnsiqa kumbra dena tamo uŋgasari mandamq di unub qaji naŋgi gisa gisaŋnjroqnej. Osiqa naŋgi endegsi minjroqnej, “Niŋgi na sulum gereiyiye. Gereiyqa osibqa wagme juwaŋ aqa ulatamu bul gereiyosib aqa ñam soqtoqniye.” Wagme juwaŋ di agi nami serie na qalnab moisiq olo tigelosiqa ŋambile soqnej. 15 Onaqa naŋgi na sulum gereiyonabqa Qotei na wagme juwaŋ bunu brantej qaji di odyonaqa a na sulum di mondor yonaqa a ŋambile osiqa anjam maroqnej. Onaqa tamo uŋgasari naŋgi sulum di biŋiyoqnsibqa a qa louoqneb. Ariya tamo uŋgasari sulum di biŋiyqa urateb qaji naŋgi di a na ñumeleŋeqnaq moreŋoqneb.

16 Onaqa wagme juwaŋ bunu brantej qaji a na aqa wau tamo naŋgi endegsi minjrej, “Niŋgi na tamo uŋgasari kalil naŋgo baŋ woqsi lanjaqsi ijo toqor atetnjriye.” Degsi minjrnaqa naŋgi gilsib toqor atetnjreb. Tamo ñam saiqoji naŋgi ti tamo ñam ti tamo ñoro ti tamo iŋgi iŋgi saiqoji unub qaji naŋgi ti tamo laŋaj naŋgi ti kaŋgal tamo naŋgi ti kalil naŋgo baŋ woqsi lanjaqsi toqor ateleŋeb. 17 Tamo bei aqaq di toqor atqa minjib saidqas di a olo bunuqna iŋgi awaiyqa marqas getentqab. A iŋgi bei qariŋyosim silali oqa marqas dego getentqab. Toqor di agi wagme juwaŋ aqa segi ñam. Iga aqa ñam di sisiyqom di aqa utru brantqas. 18 Tamo a areqalo bole ti sqas di a toqor di aqa utru geregere poiyqa kere. Tamo a powo ti sqas di a wagme juwaŋ aqa ñam geregere sisiyem. Iga ñam di sisiyqom di iga tamo naŋgo ñam sisiyeqnum dego kere. Ariya iga ñam di sisiyqom di agi 666 brantqas.